Sa mabilisan at paspasang takbo ng buhay ngayon, hindi na natin alam
kung paano natin sisimulan ang ating mga gawain.
Kaya naman, minsa’y nalulungkot tayo dahil hindi natin natatapos ang mga
dapat nating gawin.
Ngunit kung tayo’y organisado, mabibigyan tayo nito ng pangmatagalang
kasiyahan. Bakit? Alamin:
- Kung
tayo’y organisado, magiging masaya tayo dahil nagagawa nating matapos ang
ating mga gawain sa takdang panahon. Ang pakiramdam na natatapos natin ang
ating mga gawain ay nagbibigay ng kasiyahan sapagkat binibigyan tayo nito
ng dagag-kumpyansa sa sarili. Kung may sapat na tiwala tayo sa ating mga
sarili, taas-noo tayong makakaharap sa ibang tao na may matamis na ngiti
sa ating mga labi.
- Ang
pagiging organisado ay nakapagpapasaya sa atin dahil nagiging produktibo
tayo. Kung tayo ay productive, marami pa tayong ibang gawaing maaaring
matapos. Ika nga ng ilan, maikli lang ang ating buhay, kaya naman marapat
lamang na gawin na natin ang mga bagay na makapagbibigay ng kasiyahan sa
atin.
Maging Kuntento Buhay – Isa Pang Paraan Para Maging Masaya
Marahil ay naitatanong natin sa ating mga sarili: Bakit ang ilang
pamilya ay nakukuha pa ring ngumiti kahit hindi ganoon katiwasay ang kanilang
pamumuhay? Isa lang ang sagot riyan: Dahil kuntento sila sa kung ano ang meron
sila.
Bakit nga ba nagbibigay ng kasiyahan ang pagiging kuntento sa buhay ng
isang tao? Naririto ang ilang mga dahilan:
- Kapag
kuntento ka sa buhay mo, hindi ka na naghahangad ng mga bagay na alam mo
namang imposible mong makamit. Hindi ito dapat ihalintulad sa kawalan ng
pangarap. Ang pagiging kuntento ay pagpapasalamat sa mga biyayang
natatanggap natin, gaano man ito kaliit. Kung kuntento tayo, laging
mamumutawi ang mga ngiti sa ating mga labi dahil nararamdaman natin na
tayo’y mapalad.
- Masaya ang mga taong kuntento sa buhay dahil hindi nila ikinukumpara ang kanilang buhay sa kung anong meron ang ibang tao. Kung lagi tayong nagkukumpara, lagi nating mararamdaman na may kulang sa ating buhay. Dahil pakiramdam natin ay laging may mas nakatataas sa atin.
